ຄວາມປອດໄພຂໍ້ມູນຂອງອົງກອນມາອັນດັບໜຶ່ງ
ໃນຕອນເຊົ້າຂອງວັນທີ 09/02/2015 ໄດ້ມີພິທີເປີດງານຕະຫຼາດນັດ ທີ່ຄະນະເສດຖະສາດ ແລະ ບໍລິຫານທຸລະກິດ ໂດຍຕັດແຜ່ນຜ້າເປີດງານ ແມ່ນ ທ່ານ ຮສ ສົມຈິດ ສຸກສະຫວັດ ຄະນະບໍດີ ຄະນະເສດຖະສາດ ແລະ ບໍລິຫານທຸລະກິດ, ງານຕະຫຼາດນັດຄັ້ງນີ້ ແມ່ນຈັດຂຶ້ນເພືື່ອໃຫ້ນັກສຶກສາໄດ້ລົງຕົວຈິງໃນພາກປະຕິບັດ, ຮຽນຮູ້ການດຳເນີນທຸລະກິດຂອງຕົນ
ເຊິ່ງງານດັ່ງກ່າວຈະມີແຕ່ວັນທີ 09-13/02/2015 ທີ່ໜ້າຕຶກຂອງຄະນະເສດຖະສາດ ແລະ ບໍລິຫານທຸລະກິດ
ດັ່ງນັ້ນ, ຈຶ່ງເຊີນຊວນບັນດາທ່ານໄປຮ່ວມງານດັ່ງກ່າວນີ້ດ້ວຍ.
ຮູບພາບ: ວາດສະໜາ ສົມພົນ
ເພື່ອເຮັດໃຫ້ການນຳໃຊ້ລະບົບຄອມພິວເຕີ ພາຍໃນ ມຊ ມີຄວາມປອດໄພສູງສຸດ, ສູນໄອທີ ຈຶ່ງໄດ້ສຸມໃສ່ ການຕິດຕັ້ງລະບົບປ້ອງກັນຄວາມປອດໄພ ໃນເຄື່ອງຄອມພິວເຕີຕ່າງໆ ໂດຍນຳສະເໜີລະບົບປ້ອງກັນຄວາມປອດໄພ ລະດັບໂລກ ຈາກບໍລິສັດ ESET ຫຼືທີ່ຫຼາຍທ່ານຈະຄຸ້ນເຄີຍໃນຊື່ NOD32.
ໂດຍລະບົບດັ່ງກ່າວນີ້ ຈະມີການຕິດຕັ້ງເຄື່ອງຄອມພິວເຕີແມ່ຂ່າຍ (ເຊີເວີ) ຢູ່ໃນເຄືອຂ່າຍຂອງສູນໄອທີ ມຊ ທີ່ສາມາດຮອງຮັບການ ປັບປຸງຂໍ້ມູນໃຫ້ເຄື່ອງຄອມພິວເຕີພາຍໃນເຄືອຂ່າຍພາຍໃນ ມຊ ເຖິງ 500 ໜ່ວຍ. ປະຈຸບັນລະບົບດັ່ງກ່າວ ກຳລັງຕິດຕັ້ງ ແລະ ທົດສອບທາງດ້ານເທັກນິກຢູ່ ແລະ ພ້ອມຈະໃຫ້ບໍລິການໃນມໍ່ໆນີ້.
ລາຍລະອຽດການນຳໃຊ້, ຄຸນນະສົມບັດຕ່າງໆ ຂອງລະບົບ ລວມທັງວິທີຕິດຕັ້ງລົງ ເຄື່ອງຄອມພິວເຕີຂອງທ່ານ ແມ່ນສາມາດຕິດຕາມໄດ້ ໃນເວັບໄຊສູນໄອທີ ມຊ ນີ້.
ທ່າມກາງທີ່ທົ່ວພັກ, ທົ່ວລັດ ແລະ ທົ່ວປວງຊົນລາວ ພວມສ້າງສຸມໃສ່ ສ້າງຜົນງານຕາມມະຕິຂອງກອງປະຊຸມໃຫຍ່ ຄັ້ງທີ IX ຂອງພັກໃຫ້ປະກົດຜົນເປັນຈິງ ພ້ອມທັງເພື່ອຄຳນັບຮັບຕ້ອນກອງປະຊຸມໃຫຍ່ ຄັ້ງທີ X ຂອງພັກທີ່ຈະມາເຖິງໃນມໍ່ໆນີ້ນັ້ນ, ຕອນບ່າຍວັນ 30 ມັງກອນ 2015 ທີ່ສະໂມສອນຊັ້ນສອງ ສຳນັກງານອະທິການບໍດີ ໄດ້ມີການຈັດກອງປະຊຸມໃຫຍ່ຄັ້ງທີ IV ຂອງສະຫະພັນກຳມະບານ ມຊ ຂຶ້ນ.
ເຂົ້າຮ່ວມໃນກອງປະຊຸມໃນຄັ້ງນີ້ນັ້ນ, ມີທ່ານ ສຈ.ດຣ ສຸກກົງແສງ ໄຊຍະເລີດ ກຳມະການສູນກາງພັກ ຄະນະພັກ ກະຊວງສຶກສາທິການ ແລະ ກິລາ ອະທິການບໍດີມະຫາວິທະຍາໄລແຫ່ງຊາດ, ທ່ານ ຄູນມີ ພົມມະນິມິດ ຄະນະບໍລິຫານງານ ສູນກາງກຳມະບານລາວ ປະທານສະຫະພັນກຳມະບານກະຊວງສຶກສາທິການ ແລະ ກິລາ, ທ່ານ ຮສ.ດຣ ສາຍຂອງ ສາຍນາສິນ ຄະນະພັກ ກະຊວງສຶກສາທິການ ແລະ ກິລາ ເລຂາອົງຄະນະພັກ ຮອງອະທິການບໍດີ ມະຫາວິທະຍາໄລແຫ່ງຊາດ , ປະທານກຳມະບານ ມຊ, ປະທານສະຫະພັນແມ່ຍິງ ມຊ, ເລຂາຊາວໜຸ່ມ ມຊ ແລະ ບັນດາຜູ້ແທນສົມບູນ ແລະ ແຂກທີ່ຖືກເຊີນ ລວມທັງໝົດປະມານ 200 ຄົນ. ໃນນັ້ນ ສະຫາຍ ອະພິສິດ ເທບພະວົງສາ ຫົວໜ້າໜ່ວຍກຳມະບານ ສູນໄອທີ, ກໍ່ແມ່ນຕາງໜ້າ ສະມາຊິກກຳມະບານຂອງສູນ ເຂົ້າຮ່ວມເປັນຜູ້ແທນຂອງກອງປະຊຸມ.
ທ່ານ ຮສ ດຣ ອານຸລົມ ວິໄລພອນ ກໍ່ໄດ້ຜ່ານບົດສະຫລຸບການປະຕິບັດວຽກງານກຳມະບານ ໃນໄລຍະ 3 ປີ ຜ່ານມາ ແລະ ຜ່ານທິດທາງແຜນການເຄື່ອນໄຫວ ຂອງກຳມະບານ ໃນ 5 ປີ ຕໍ່ໜ້າ. ກອງປະຊຸມຍັງໄດ້ມີຮັບການອຳລາຂອງຄະນະບໍລິຫານງານຊຸດເກົ່າ ແລະ ເລືອກຕັ້ງເອົາຄະນະບໍລິຫານງານກຳມະບານ ມຊ ຊຸດທີ IV ອີກດ້ວຍ ເຊິ່ງຜົນການເລືອກຕັ້ງຄະນະບໍລິຫານງານຊຸດໃໝ່ນີ້ແມ່ນ
1. ທ່ານ ຮສ.ດຣ ອານຸລົມ ວິໄລພອນ ເປັນປະທານສະຫະພັນກຳມະບານ ມຊ
2. ທ່ານ ໂພໄຊ ເທບວິໄລວົງ ເປັນຮອງປະທານສະຫະພັນກຳມະບານ ມຊ
3. ທ່ານ ບຸນທອນ ສຸຂະວົງ ເປັນຮອງປະທານສະຫະພັນກຳມະບານ ມຊ
4. ທ່ານ ຄຳເຟືອງ ລໍວັນໄຊ ເປັນຮອງປະທານສະຫະພັນກຳມະບານ ມຊ
5. ທ່ານ ນາງ ທັດສະນາລອນ ສີສຸນົນ ເປັນປະທານກວດກາ
ສະຫະພັນກຳມະບານ ມຊ ແມ່ນຮາກຖານກຳມະບານ ທີ່ມີຈຳນວນສະມາຊິກຫຼາຍກວ່າໝູ່ (ນັບທັງພະນັກງານ-ຄູອາຈານ ແລະ ນັກສຶກສາ) ໃນບັນດາຮາກຖານທີ່ຢູ່ພາຍໃນກະຊວງ ສຶກສາທິການ ແລະ ກິລາ. ໃນຈຳນວນພະນັກງານລັດຖະກອນທັງໝົດ ໃນມະຫາວິທະຍາໄລແຫ່ງຊາດ 1800 ກວ່າຄົນນັ້ນ, ສອງສ່ວນສາມ ແມ່ນສະມາຊິກກຳມະບານ. ຕາມແຜນການ ໃນໄລຍະ 5 ປີຕໍ່ໜ້າ, ສະຫະພັນກຳມະບານ ມຊ ຈະກໍ່ສ້າງ ຮັບເອົາສະມາຊິກເພີ່ມຂຶ້ນໃຫ້ໄດ້ 30 ເປີເຊັນຂອງຈຳນວນປະຈຸບັນ.
ໃນໂອກາດນີ້, ສູນເທັກໂນໂລຊີ-ຂໍ້ມູນຂ່າວສານ (ສູນໄອທີ) ມຊ ຂໍຊົມເຊີຍຜົນສຳເລັດຂອງກອງປະຊຸມໃຫຍ່ຄັ້ງທີ IV ຂອງສະຫະພັນ ກຳມະບານ ມຊ ແລະ ສະມາຊິກກຳມະບານ ມຊ ທັງໝົດ ທີ່ຍາດມາໄດ້, ພ້ອມກັນນັ້ນ ກໍ່ຮຽກຮ້ອງໃຫ້ສະມາຊິກກຳມະບານຂອງ ສູນ ສຸມທຸກຄວາມສາມາດຂອງຕົນໃນວຽກງານ ທີ່ຕົນເອງຮັບຜິດຊອບ ເພື່ອຍາດໄດ້ຜົນງານໃໝ່ ໃຫຍ່ຫລວງກວ່າເກົ່າ.