ໃນວັນທີ 5 ເມສາ 2017 ທີ່ສະໂມສອນໃຫ່ຍມະຫາວິທະຍາໄລແຫ່ງຊາດ, ຄະນະບໍລິຫານງານຊາວໜຸ່ມມະຫາວິທະຍາໄລແຫ່ງຊາດ ໄດ້ຈັດພິທີປາຖະກາຖາ ເພື່ອເປັນການຫວນຄືນມູນເຊື້ອຂອງ ຄະນະຊາວໜຸ່ມ ປະຊາຊົນ ປະຕິວັດລາວ ເນື່ອງໃນໂອກາດວັນສ້າງຕັ້ງ ຄະນະຊາວໜຸ່ມ ປະຊາຊົນ ປະຕິວັດລາວ ຄົບຮອບ 62 ປີ (14 ເມສາ 1955 – 14 ເມສາ 2017) ໂດຍໃຫ້ກຽດເຂົ້າຮ່ວມໃນພິທີຄັ້ງນີ້ມີ: ສະຫາຍ ປະລິນຍາເອກ ສຳລານ ພັນຄະວົງ ເລຂາທິການສູນກາງຊາວໜຸ່ມປະຊາຊົນ ປະຕິວັດລາວ, ຄະນະພັກ, ເລຂາຄະນະບໍລິຫານງານຊາວໜຸ່ມກະຊວງສຶກສາທິການ ແລະ ກິລາ, ສະຫາຍ ນ. ວິລະວອນ ພັນທະວົງ ຮອງເລຂາ, ປະທານກວດກາຄະນະບໍລິຫານງານສູນກາງຊາວໜຸ່ມປະຊາຊົນ ປະຕິວັດລາວ, ສະຫາຍພຽງສະໜິດ ຈັນທະວິໄຊ ເລຂາຄະນະບໍລິຫານງານຊາວໜຸ່ມມະຫາວິທະຍາໄລແຫ່ງຊາດ ແລະ ຄະນະນຳ, ສະມາຊິກຊາວໜຸ່ມ ແລະ ເຍົາວະຊົນ ມະຫາວິທະຍາໄລແຫ່ງຊາດຈຳນວນ 1.000 ສະຫາຍ.
ຈຸດປະສົງຂອງພິທີດັ່ງກ່າວແມ່ນ:
- ເພື່ອໃຫ້ຄະນະນຳ, ສະມາຊິກຊາວໜຸ່ມ ແລະ ເຍົາວະຊົນ ມະຫາວິທະຍາໄລແຫ່ງຊາດເຫັນໄດ້ມູນເຊື້ອອັນພິລະອາດຫານຂອງຊາວໜຸ່ມຮຸ້ນກ່ອນ ແລະ ປະກອບສ່ວນເຂົ້າໃນພາລະກິດປົດປ່ອຍ ແລະ ປົກປັກຮັກສາ ແລະ ສ້າງສາພັດທະນາປະເທດຊາດໃນໄລຍະຜ່ານມາ ແລະ ໃນໄລຍະໃໝ່
- ເພື່ອເຮັດໃຫ້ຊາວໜຸ່ມ ແລະ ເຍົາວະຊົນ ມະຫາວິທະຍາໄລແຫ່ງຊາດ ກຳແໜ້ນໄດ້ຜົນງານ, ວິລະກຳອັນຍອດຍິ່ງ, ຄວາມເສຍສະຫຼະ, ຄວາມຮັກຊາດອັນດູດດື່ມຂອງສະມາຊິກຊາວໜຸ່ມຮຸ້ນກ່ອນທີ່ມີຕໍ່ປະເທດຊາດ ແລະ ນຳເອົາເປັນແບບຢ່າງໃນການປະຕິບັດສິດ ແລະ ພັນທະຂອງຕົນໃນພາລະກິດປົກປັກຮັກສາ ແລະ ສ້າງສາພັດທະນາປະເທດຕາມທິດສັງຄົມນິຍົມເທື່ອລະກ້າວ
- ເພື່ອເປັນການສ້າງຂະບວນການຂໍ່ານັບຮັບຕ້ອນວັນສ້າງຕັ້ງຄະນະຊາວໜຸ່ມ ປະຊາຊົນ ປະຕິວັດລາວ ຄົບຮອບ 62 ປີ
ເຊິ່ງກ່າວເປີດພິທີໂດຍ ສະຫາຍ ພຽງສະໜິດ ຈັນທະວິໄຊ ເລຂາຄະນະບໍລິຫານງານຊາວໜຸ່ມມະຫາວິທະຍາໄລແຫ່ງຊາດ ພ້ອມນັ້ນ ສະຫາຍ ພຽງສະໜິດ ຈັນທະວິໄຊ ຍັງໄດ້ຜ່ານບົດສະຫຼຸບຜົນງານການເຄື່ອນໄຫວໄຕມາດທີ່ 1 ປະຈຳປີ 2017 ແລະ ແຜນການເຄື່ອນໄຫວໄຕມາດທີ 2 ປະຈຳປີ 2017 ຂອງຄະນະຊາວໜຸ່ມ ປະຊາຊົນ ປະຕິວັດລາວ ມະຫາວິທະຍາໄລແຫ່ງຊາດ.
ຈາກນັ້ນສະຫາຍ ນ. ວິລະວອນ ພັນທະວົງ ຮອງເລຂາ, ປະທານກວດກາຄະນະບໍລິຫານງານສູນກາງຊາວໜຸ່ມປະຊາຊົນ ປະຕິວັດລາວໄດ້ຂຶ້ນບັນຍາຍກ່ຽວກັບມູນເຊື້ອຂອງ ຄະນະຊາວໜຸ່ມ ປະຊາຊົນ ປະຕິວັດລາວ. ສຸດທ້າຍຕາງໜ້າສະຫະພັນກຳມະບານ ແລະ ສະຫະພັນແມ່ຍິງ ມະຫາວິທະຍາໄລແຫ່ງຊາດໄດ້ຂຶ້ນກ່າວຄຳອວຍພອນ ແລະ ມອບກະຕ່າດອກໄມ້ເນື່ອງໃນໂອກາດວັນສ້າງຕັ້ງຄະນະຊາວໜຸ່ມ ປະຊາຊົນ ປະຕິວັດລາວ ຄົບຮອບ 62 ປີ
…