ທີມອາວຸໂສ ສູນໄອທີ ຍາດໄດ້ອັນດັບທີ 3 ໃນງານແຂ່ງຂັນເປຕັງ ສະເຫຼີມສະຫຼອງວັນສ້າງຕັ້ງ ມຊ ຄົບຮອບ 21 ປີ ທີ່ສະໜາມເປຕັງ ມຊ.
ເພື່ອເປັນການສ້າງຂະບວນການເບີກບານມ່ວນຊື່ນ ສະເຫຼີມສະຫຼອງວັນສ້າງຕັ້ງ ມະຫາວິທະຍາໄລແຫ່ງຊາດ ທີ່ໝູນວຽນມາອີກວາລະໜຶ່ງ ເຊິ່ງປີນີ້ ແມ່ນຄົບຮອບ 21 ປີແລ້ວ, ດັ່ງນັ້ນ ທາງການນຳຂອງ ມຊ ຈຶ່ງໄດ້ຈັດການແຂ່ງຂັນກິລາເປຕັງຂຶ້ນ ໃນວັນເສົາ ວັນທີ 11 ພະຈິກ 2017 ທີ່ຜ່ານມາ ທີ່ສະໜາມກິລາເປຕັງ ມຊ ວິທະຍາເຂດດົງໂດກ ໂດຍການເປັນປະທານຂອງທ່ານ ຮສ ປອ ອຸດົມ ພອນຄຳເພັງ ຮອງອະທິການບໍດີ ມຊ ເຊິ່ງນອກຈາກຈະເປັນປະທານຈັດງານແລ້ວ, ທ່ານຍັງໄດ້ເຂົ້າຮ່ວມແຂ່ງຂັນໃນນາມທີມອາວຸໂສສຳນັກງານ ອະທິການບໍດີ ອີກດ້ວຍ.
ປີນີ້ການແຂ່ງຂັນກິລາເປຕັງຖືວ່າຄຶກຄັກ ກວ່າປີຜ່ານໆມາ ເພາະມີທຸກຄະນະວິຊາ ແລະ ຫ້ອງການຕ່າງໆອ້ອມຂ້າງສຳນັກງານອະທິການບໍດີເຂົ້າຮ່ວມລວມ 26 ທີມ. ການແຂ່ງຂັນ ໄດ້ຖືກແບ່ງອອກເປັນ 3 ປະເພດຄື ທີມອາວຸໂສ, ທີມຊາວໜຸ່ມ ແລະ ທີມສະຫະພັນແມ່ຍິງ ໂດຍແຕ່ລະທີມ ປະກອບດ້ວຍນັກກິລາ 3 ທ່ານ ຈຶ່ງຖືໄດ້ວ່າມີນັກກິລາເຂົ້າຮ່ວມຢ່າງຫຼວງຫຼາຍ. ພິເສດໃນການແຂ່ງຂັນນີ້ ຍັງມີທີມຈາກທະນາຄານຮ່ວມພັດທະນາ (Joint Development Bank ຫຼື JDB) ເຂົ້າຮ່ວມ 3 ທີມ ແລະ ປະກອບສ່ວນສະໜັບສະໜູນການຈັດງານ ເປັນມູນຄ່າ 5 ລ້ານກີບອີກດ້ວຍ.
ສູນໄອທີພວກເຮົາ ນອກຈາກປະກອບສ່ວນໃນການຈັດງານຄັ້ງນີ້ແລ້ວ, ຍັງໄດ້ສົ່ງທີມເຂົ້າຮ່ວມແຂ່ງຂັນ ທັງປະເພດທີມອາວຸໂສ ນຳໂດຍຄະນະອຳນວຍການສູນ ທ່ານ ປອ ພອນແກ້ວ ຈັນທະມາລີ ແລະ ທ່ານ ຄຳພັນ ສິດທະວົງ ແລະ ປະເພດ ທີມຍິງ ນຳໂດຍ ທ່ານ ນາງ ມະໄລພອນ ສຸລິຍະວົງ.
ຜົນການແຂ່ງຂັນທີມຍິງຂອງສູນປະກົດວ່າ ບໍ່ໄດ້ລຸ້ນ ຕົກຮອບໄປຕັ້ງແຕ່ຮອບທຳອິດ, ສ່ວນທີມອາວຸໂສ ສູນໄອທີ ຖືວ່າເປັນຕົວເຕັງໃນງານ ເພາະມີການເຝິກຊ້ອມກະກຽມເພື່ອງານນີ້ໂດຍສະເພາະ. ໜ້າເສຍດາຍ ທີ່ຕ້ອງໄປສູ້ສຶກສາຍເລືອດ ກັບເຕັງໜຶ່ງປະເພດທີມອາວຸໂສ ສຳນັກງານອະທິການບໍດີ ໃນຮອບຮອງຊະນະເລີດ ເຮັດໃຫ້ຕົກຮອບໄປຢ່າງຫວຸດຫວິດ. ແຕ່ເຖິງຢ່າງໃດກໍ່ຕາມ ໃນການຊິງອັນດັບ 3 ກັບທີມຈາກ ທະນາຄານຮ່ວມພັດທະນານັ້ນ ທີມອາວຸໂສ ສູນໄອທີ ກໍ່ເອົາຊະນະ ເປັນລາງວັນປອບໃຈໄປ.
ຜົນການແຂ່ງຂັນທັງ 3 ປະເພດມີດັ່ງນີ້:
ປະເພດທີມສະຫະພັນແມ່ຍິງ
- ອັນດັບ 1: ທີມສຳນັກງານອະທິການບໍດີ
- ອັນດັບ 2: ທີມໂຮງຮຽນພອນສະຫວັນ
- ອັນດັບ 3: ທີມທະນາຄານຮ່ວມພັດທະນາ
ປະເພດທີມອາວຸໂສ:
- ອັນດັບ 1: ສຳນັກງານອະທິການບໍດີ
- ອັນດັບ 2: ຄະນະວິທະຍາສາດທຳມະຊາດ
- ອັນດັບ 3: ສູນໄອທີ
ປະເພດທີມຊາວໜຸ່ມ:
- ອັນດັບ 1: ຄະນະວິທະຍາສາດທຳມະຊາດ
- ອັນດັບ 2: ສຳນັກງານອະທິການບໍດີ
- ອັນດັບ 3: ທະນາຄານຮ່ວມພັດທະນາ ແລະ ຄະນະວິສະວະກຳສາດ (ອັນດັບ 3 ຮ່ວມ)
ການຈັດການແຂ່ງຂັນກິລາເປຕັງ ສະເຫຼີມສະຫຼອງວັນສ້າງຕັ້ງ ມຊ ຄົບຮອບ 21 ປີ ໄດ້ສຳເລັດລົງ ຕາມລະດັບຄາດໝາຍທີ່ວາງໄວ້. ຂໍສະແດງຄວາມຂອບໃຈມາຍັງນັກກິລາ ແລະ ຄະນະຮັບຜິດຊອບຈັດການແຂ່ງຂັນ ແລະ ຜູ້ສະໜັບສະໜູນທຸກພາກສ່ວນ.
