ໂດຍໄດ້ຮັບມອບໝາຍຈາກຂັ້ນເທິງ ໃນວັນທີ 16 ຕຸລາ ທີ່ຜ່ານມາ, ພະນັກງານສູນໄອທີ ໂດຍແມ່ນ ທ່ານ ນາງ ມະໄລພອນ ສຸລິຍະວົງ ແລະ ທ່ານ ອະພິສິດ ເທບພະວົງສາ ໄດ້ເຂົ້າຮ່ວມງານ ເປີດໂລກໄອທີ ຄັ້ງທີ 3 ສ້າງອະນາຄົດດ້ວຍການຮຽນຮູ້ ກ້າວສູ່ຍຸກ Cloud Computing ທີ່ ມະຫາວິທະຍາໄລຂອນແກ່ນ. ງານດັ່ງກ່າວ ແມ່ນຈັດຂຶ້ນ ທີ່ຕຶກວິທະຍາໄລ ການປົກຄອງທ້ອງຖິ່ນ (ຕອນເຊົ້າ) ແລະ ທີ່ອາຄານສູນສາລະສົນເທດ (ຕອນບ່າຍ) ເຊິ່ງໃນຕອນເຊົ້າຈະເປັນເປີດງານ ແລະ ການສຳມະນາ ກ່ຽວກັບການນຳໃຊ້ Cloud technology ເຂົ້່າໃນພາກລັດ, ພາກທຸລະກິດ ແລະ ການສຶກສາ. ສ່ວນຕອນບ່າຍຈະເປັນການເຝິກປະຕິບັດການ ໂດຍແຍກເປັນ 3 ຫ້ອງ: ສຳລັບລະດັບຜູ້ໃຊ້, ລະດັບຜູ້ເບິ່ງແຍງລະບົບ ແລະ ລະດັບຜູ້ພັດທະນາໂປແກມ.
ເຂົ້າຮ່ວມໃນງານດັ່ງກ່າວ ມີທ່ານ ລັດຖະມົນຕີວ່າການກະຊວງ ICT ຂອງປະເທດໄທ ເປັນປະທານເປີດງານ, ວິທະຍາກອນ ບັນຍາຍ ແມ່ນມາຈາກ ບໍລິສັດ True IDC, ສະຖາບັນ IMC Institute, ມະຫາວິທະຍາໄລຂອນແກ່ນ ແລະ ຈາກ ບໍລິສັດ Google (Asia Pacific) ພ້ອມກັນນັ້ນ ກໍ່ມີແຂກຮັບເຊີນຈາກສະຖາບັນການສຶກສາ ທົ່ວພາກຕາເວັນອອກສ່ຽງເໜືອ ຂອງປະເທດໄທ, ນັກວິຊາການ ແລະ ນັກສຶກສາ ລວມຈຳນວນ ຫຼາຍກວ່າ 750 ຄົນ, ເຊິ່ງໃນນີ້ ແມ່ນລວມທັງ ພິທີກອນ ແລະ ຜູ້ຈັດງານ ທ່ານ ນາງ ປານຣະພີ ຣະພິພັນ ພິທີກອນ ລາຍການໂທລະພາບ ຊ່ອງ 3 ອີກດ້ວຍ.
ນອກຈາກການຮ່ວມງານ ສຳມະນາໃນຕອນເຊົ້າຂອງວັນດັ່ງກ່າວແລ້ວ, ຍັງໄດ້ມີໂອກາດ ພົບປະ ແລະ ຖ່າຍຮູບຮ່ວມ ກັບ ຄະນະນັກສຶກສາລາວ ທີ່ກຳລັງ ສຶກສາຢູ່ໃນມະຫາວິທະຍາໄລຂອນແກ່ນ, ເຊິ່ງຕາມການສອບຖາມ ເຫັນວ່າ ປະຈຸບັນນີ້ ມີນັກສຶກສາລາວ ກຳລັງສຶກສາຕໍ່ ໃນລະດັບປະລິນຍາໂທ ແລະ ປະລິນຍາເອກ ທີ່ ມະຫາວິທະຍາໄລຂອນແກ່ນ ລວມກວ່າ 100 ຄົນ.
