ໃນຕອນບ່າຍ 13.30 ໂມງ ຂອງວັນທີ 24 ມິຖຸນາ 2016 ທີ່ຜ່ານມາ, ໄດ້ມີກອງປະຊຸມທາບທາມ ເອົາຮອງອະທິການບໍດີ ມຊ ຂຶ້ນ. ເຂົ້າຮ່ວມໃນພິທີດັ່ງກ່າວ, ມີທ່ານ ສຈ ປອ ສົມສີ ຍໍພັນໄຊ ວ່າການແທນ ອະທິການບໍດີ ມຊ ເປັນປະທານ, ມີຄະນະອະທິການບໍດີ ມຊ, ຄະນະວິຊາ, ສະຖາບັນ, ຫ້ອງການ, ສູນ, ພະນັກງານຫຼັກແຫຼ່ງຂອງພາກສ່ວນຕ່າງໆ ເຂົ້າຮ່ວມ ຢ່າງພ້ອມພຽງ. ພ້ອມກັນນັ້ນ ກໍ່ໄດ້ມີຜູ້ຕາງໜ້າຈາກກະຊວງສຶກສາທິການ ແລະ ກິລາ ກໍ່ໄດ້ເຂົ້າຮ່ວມສັງເກດການ ການທາບທາມດັ່ງກ່າວ.
ທ່ານ ຮສ ວັນທອງ ຍອຍສາຍຄຳ ຫົວໜ້າຫ້ອງການຈັດຕັ້ງ ແລະ ຄຸ້ມຄອງພະນັກງານ ໄດ້ຂຶ້ນຜ່ານເງື່ອນໄຂ, ມາດຖານ ຂອງຜູ້ທີ່ມີສິດຖືກຄັດເລືອກໃນການທາບທາມດັ່ງກ່າວ ເຊິ່ງມີທັງໝົດ 31 ທ່ານ ເຊິ່ງແມ່ນການນຳຂັ້ນຕ່າງໆ ທີ່ຢູ່ໃນມະຫາວິທະຍາໄລແຫ່ງຊາດ. ຜົນການທາບທາມດັ່ງກ່າວ ຈະໄດ້ເປັນພື້ນຖານໃຫ້ແກ່ການຄັດເລືອກ ຮອງອະທິການບໍດີ ມຊ ຄົນໃໝ່ ເພື່ອສັບຊ້ອນໃສ່ຕຳແໜ່ງຮອງອະທິການບໍດີ ມຊ ທີ່ຫວ່າງລົງ ເນື່ອງຈາກມີການຍົກຍ້າຍປະຈຳການ.
ມະຫາວິທະຍາໄລແຫ່ງຊາດ ແມ່ນມະຫາວິທະຍາໄລຊັ້ນນຳຂອງ ສ.ປ.ປ ລາວ ທີ່ມີການບໍລິຫານທີ່ຫຼາກຫຼາຍ ແລະ ຕ້ອງການ ຜູ້ນຳພາ ທີ່ມີຄວາມຮູ້ ຄວາມສາມາດສູງ ໂດຍສະເພາະ ຕຳແໜ່ງຮອງອະທິການບໍດີ. ປະຈຸບັນ ມະຫາວິທະຍາໄລແຫ່ງຊາດ ມີຮອງອະທິການບໍດີ 4 ທ່ານຄື: ທ່ານ ຮສ ລຳໄມ ພິພັກຄະວົງ, ທ່ານ ຮສ ປອ ສາຍຂອງ ສາຍນາສິນ, ທ່ານ ຮສ ປອ ພຸດ ສິມມາລາວົງ, ແລະ ທ່ານ ຮສ ປອ ອຸດົມ ພອນຄຳເພັງ.