[facebook_like_button]
ໃນລະຫວ່າງວັນທີ 28-29/07/2016 ທີ່ຜ່ານມາ, ທ່ານ ຄຳພັນ ສິດທະວົງ ຮອງອຳນວຍການສູນໄອທີ ມຊ ແລະ ວິຊາການ ໄດ້ເຂົ້າຮ່ວມງານສຳມະນາວິຊາການ ຄັ້ງທີ່ 7 The Seventh TCU International e-Learning Conference 2016 ທີ່ຈັດຂຶ້ນທີ່ BITEC Bang na, ບາງກອກ, ປະເທດໄທ ຕາມໜັງສືເຊີນຂອງທາງ ສຳນັກງານ ຄະນະກຳມະການ ອຸດົມສຶກສາຂອງໄທ ໂດຍໂຄງການ Thai Cyber University (TCU).
ງານສຳມະນາວິຊາການຄັ້ງນີ້ ແມ່ນຈັດຂຶ້ນ ໂດຍມີຈຸດປະສົງໃນການສົ່ງເສີມ ການນຳໃຊ້ລະບົບເທັກໂນໂລຊີທີ່ທັນສະໄໝ ເຂົ້າໃນວຽກງານການສຶກສາ (e-Learning) ພ້ອມທັງເປັນການສົ່ງເສີມການຮ່ວມມືໃນດ້ານດັ່ງກ່າວ ໃນສະຖາບັນການສຶກສາທັງພາຍໃນ ແລະ ຕ່າງປະເທດ. ການຈັດສຳມະນາວິຊາການຄັ້ງນີ້ ມີຫົວຂໍ້ຂອງງານແມ່ນ “Disruptive Innovation in Education” ເຊິ່ງໄດ້ເຊື້ອເຊີນວິທະຍາກອນ ຈາກຫຼາຍປະເທດ ທີ່ມີປະສົບການສູງ ໃນດ້ານຕ່າງໆທີ່ກ່ຽວຂ້ອງມາໃຫ້ຄວາມຮູ້ ແລະ ທິດທາງໃນການພັດທະນາວົງການສຶກສາຂອງແຕ່ລະບ່ອນ.
ວິທະຍາກອນທີ່ມາໃຫ້ຄວາມຮູ້ ປະກອບມີ:
- Stephen Downes ຈາກປະເທດການາດາ
- Gerard (Gerry) Hanley ຈາກປະເທດອາເມລິກາ
- Dr. Eugene Kowch ຈາກປະເທດການາດາ
- Wang Libing ຈາກປະເທດຈີນ
- Lim, Cheolil Ph.D. ຈາກປະເທດເກົາຫຼີໃຕ້
- Tsuneo Yamada ຈາກປະເທດຍີ່ປຸ່ນ
ໃນງານດັ່ງກ່າວ ໄດ້ມີຜູ້ເຂົ້າຮ່ວມເປັນຈຳນວນຫຼວງຫຼາຍ ເຊິ່ງຕາມຕົວເລກທີ່ທາງຄະນະຈັດງານໄດ້ມີການສັງລວມ ແມ່ນມີຜູ້ເຂົ້າຮ່ວມເກືອບ 1000 ຄົນ. ໃນງານສຳມະນາດັ່ງກ່າວ ໄດ້ມີການຈັດແບ່ງອອກເປັນຫຼາຍຫ້ອງ ຫຼາຍຫົວຂໍ້ ເຊິ່ງລາຍລະອຽດ ທ່ານສາມາດດາວໂຫລດເບິ່ງໄດ້ ທີ່ຕາມລິ້ງດ້ານຂ້າງນີ້ Program_IEC2016-last ສ່ວນລາຍລະອຽດເພີ່ມເຕີມຂອງງານ ທ່ານສາມາດເຂົ້າເບິ່ງທີ່ເວັບໄຊຂອງ TCU ໄດ້ທີ່ http://iec2016.thaicyberu.go.th
ການເຂົ້າຮ່ວມງານດັ່ງກ່າວ ແມ່ນມີຄວາມສຳຄັນ ແລະ ເປັນປະໂຫຍດຢ່າງສູງ ທີ່ຈະໄດ້ນຳມາປັບໃຊ້ ໃນການພັດທະນາວົງການສຶກສາຂອງລາວ ໂດຍສະເພາະການນຳນະວັດຕະກຳໃໝ່ ເຂົ້າມານຳໃຊ້ໃນການພັດທະນາຄຸນນະພາບການສຶກສາ ໃນມະຫາວິທະຍາໄລແຫ່ງຊາດ. ສູນໄອທີ ມຊ, ຂໍສະແດງຄວາມຂອບໃຈເປັນຢ່າງສູງ ມາຍັງການນຳຂອງ TCU ໂດຍສະເພາະ ດຣ ຖາປະນີ ແລະ ພະນັກງານຂອງທ່ານ ທີ່ໄດ້ເຊີນຄະນະສູນເຂົ້າຮ່ວມ ແລະ ຍັງໄດ້ຕ້ອນຮັບ ແລະ ອຳນວຍຄວາມສະດວກເປັນຢ່າງດີ ຕະຫຼອດໄລຍະການເຂົ້າຮ່ວມງານຄັ້ງນີ້. ພ້ອມກັນນັ້ນ ກໍ່ຕ້ອງສະແດງຄວາມຂອບໃຈ ມາຍັງທ່ານ Ram Tiwari ຈາກ ສສວທ ປະເທດໄທ ທີ່ໄດ້ມອບປື້ມກ່ຽວກັບການທົດລອງວິຊາຟີຊິກ ໃນລະດັບ ມ4 ຂອງໄທ ໃຫ້ພວກເຮົາດ້ວຍ.
ສູນໄອທີ ມຊ ຈະມີການສືບຕໍ່ຮ່ວມມື ດ້ານວິຊາການ ກັບພາກສ່ວນຕ່າງໆ ທີ່ເຮັດວຽກດ້ານການສຶກສາຂອງໄທ ເຊັ່ນ TCU, UNINET ແລະ ພາກສ່ວນອື່ນໆ ເພື່ອເຮັດໃຫ້ການພັດທະນາ ແລະ ນຳໃຊ້ເທັກໂນໂລຊີອັນທັນສະໄໝ ເຂົ້າຮັບໃຊ້ວຽກງານການສຶກສາໃຫ້ປະກົດເປັນຈິງ ໃນອະນາຄົດ.
