ມະຫາວິທະຍາໄລແຫ່ງຊາດໄດ້ຈັດຊຸດຝຶກອົບຮົມການຄຸ້ມຄອງ ແລະ ນຳໃຊ້ໂປຼແກຼມຊັບສິນແບບໃໝ່ຂອງ ມຊ ເຊິ່ງການຝຶກອົບຮົມດັ່ງກ່າວຈັດຂຶ້ນໃນລະຫວ່າງວັນທີ 03 ຫາ 05 ມີນາ 2017 ທີ່ຫ້ອງປະຊຸມຄູນຊັບ (ທ່າລາດ). ໂດຍມີນັກຝຶກອົບຮົມຈຳນວນ 29 ທ່ານທີ່ມາຈາກແຕ່ລະພາກສ່ວນຄະນະວິຊາ, ສູນ, ສະຖາບັນ, ຫໍສະໝຸດກາງ, ໂຮງຮຽນພອນສະຫວັນ, ບ້ານພັກຊີເກມ, ໃນນັ້ນມີພະນັກງານສູນຂໍ້ມູນຂ່າວສານຈຳນວນ 01 ທ່ານທີ່ໄດ້ເຂົ້າຮ່ວມ.
ເຂົ້າຮ່ວມໃນການເປີດຊຸດຝຶກອົບຮົມຄັ້ງນີ້ມີ ທ່ານ ຮສ. ຄຳເຜີຍ ພົມມະຈັນ ຫົວໜ້າຫ້ອງການ ການເງິນ ມຊ, ທ່ານ ຄຳໃສ ໄຊຍະລິນ ຮອງຫົວໜ້າຫ້ອງການ ການເງິນ ມຊ, ທ່ານ ສຸວັນທອນ ລັດຕະນະວົງ ຫົວໜ້າພະແນກຊັບສິນຫ້ອງການການເງິນ ມຊ, ທ່ານໂອະນີ ສີຫາລາດ ຮອງຫົວໜ້າພະແນກຊັບສິນກະຊວງສຶກສາທິການ ແລະ ກິລາ, ທ່ານ ສຸດໃຈ ຫວັນວົງໄຊ ພະແນກບໍລິຫານ ກະຊວງສຶກສາທິການ ແລະ ກິລາ. ໃນວາລະເປີດການຝຶກອົບຮົມຢ່າງເປັນທາງການ ທ່ານ ຮສ. ຄຳເຜີຍ ພົມມະຈັນ ໄດ້ຍົກໃຫ້ເຫັນເຖິງຄວາມສຳຄັນຂອງການຄຸ້ມຂອງຊັບສິນທີ່ເປັນຂອງລັດ ກໍຄືຊັບສິນທີ່ເປັນຂອງ ມຊ.
ໃນການຝຶກອົບຮົມຄັ້ງນີ້ແມ່ນມີຈຸດປະສົງໃຫ້ພະນັກງານຜູ້ທີ່ຮັບຜິດຊອບວຽກງານການຄຸ້ມຄອງຊັບສິນໄດ້ຮູ້ຈັກການຂຶ້ນບັນຊີ ຊັບສິນ, ການໃສ່ລະຫັດຊັບສິນ, ການປະຕິບັດລະບຽບການຄຸ້ມຄອງຊັບສິນ ແລະ ການນຳໃຊ້ໂປຼແກຼມຊັບສິນແບບໃໝ່ຂອງ ມຊ.
ພາບ ແລະ ຂ່າວໂດຍ: ນ. ນັດ ດອນພົນດີ