ສສຊ ນະຄອນຫຼວງ ລົງພົບປະ ພະນັກງານ ກຊ ສຶກສາ

[facebook_like_button]

ຕາມການແຈ້ງການຂອງຄະນະພັກ ມຊ, ຄະນະພັກຮາກຖານ ສຳນັກງານອະທິການບໍດີ ແລະ ຕາມການຕົກລົງເຫັນດີຂອງເລຂາໜ່ວຍພັກສູນໄອທີ ແລະ ສູນສຶກສາທາງໄກ, ໃນຕອນບ່າຍ 13.00 ໂມງ ຂອງວັນທີ 4 ສິງຫາ 2016 ຢູ່ທີ່ສູນວັດທະນະທຳແຫ່ງຊາດ ນະຄອນຫຼວງວຽງຈັນ ພະນັກງານສູນໄອທີ ໄດ້ເຂົ້າຮ່ວມ ພິທີຮ່ວມຮັບຟັງເນື້ອໃນ ຜົນສຳເລັດ ຂອງກອງປະຊູມຄັ້ງປະຖົມມະລຶກ ຂອງສະພາແຫ່ງຊາດ ຊຸດທີ VIII ແລະ ສະພາປະຊາຊົນ ນະຄອນຫຼວງວຽງຈັນ ຊຸດທີ I ຂຶ້ນ ເຊິ່ງຈັດຂຶ້ນໂດຍກະຊວງສຶກສາທິການ ແລະ ກິລາ.

ສະມາຊິກສະພາແຫ່ງຊາດ ຊຸດທີ VIII ແລະ ສະພາປະຊາຊົນ ຊຸດທີ I ນະຄອນຫຼວງວຽງຈັນ ທີ່ລົງພົບປະຄັ້ງນີ້ ມີທັງໝົດ 4 ທ່ານ ເຊິ່ງເປັນຄະນະປະທານໃນພິທີ ປະກອບມີ ທ່ານ ປອ ໄຊສົມພອນ ພົມວິຫານ, ທ່ານ ນາງ ພອນເພັດ ບຸບຜາ, ທ່ານ ຮສ ປອ ພຸດ ສິມມາລາວົງ ແລະ ທ່ານ ນາງ ຄຳຟອງ ພູມວົງໄຊ.

ໃນການພົບປະ ແລະ ເຜີຍແຜ່ຄັ້ງນີ້ ມີຜູ້ເຂົ້າຮ່ວມເຊິ່ງແມ່ນພະນັກງານ ຄູອາຈານ ທິ່ເປັນຕົວແທນຈາກພາກສ່ວນຕ່າງໆ ອ້ອມຂ້າງກະຊວງສຶກສາທິການ ແລະ ກິລາ ໃນນະຄອນຫລວງວຽງຈັນ ເຂົ້າຮ່ວມເປັນຈຳນວນກວ່າພັນຫ້າຮ້ອຍຄົນ.

ໃນພິທີ ທ່ານ ກອງສີ ແສງມະນີ ຮອງລັດຖະມົນຕີກະຊວງສຶກສາທິການ ແລະ ກິລາ ໄດ້ສະເຫນີຈຸດປະສົງ ແລະລາຍງານຜົນການປະຕິບັດວຽກງານຕ່າງໆ ໃນຂົງເຂດຮັບຜິດຊອບຂອງຕົນ ໃນໄລຍະຫ້າປີຜ່ານມາ ເຊິ່ງມີທັງຜົນສຳເລັດທີ່ຍາດມາໄດ້ ແລະ ຄົງຄ້າງຈຳນວນໜຶ່ງ ພ້ອມທັງໄດ້ມີທິດທາງຕໍ່ໜ້າ ແລະ ຂໍ້ສະເໜີ ຕໍ່ກັບທ່ານສະມາຊິກ ສະພາແຫ່ງຊາດທີ່ລົງພົບປະອີກດ້ວຍ. ໂດຍສະເພາະການປັບປຸງຄຸນນະພາບຂອງການສຶກສາ ທີ່ມີຫລາຍຕົວຊີ້ວັດຕອງປະຕິບັດໃຫ້ໄດ້ ເພື່ອໃຫ້ຮອງຮັບການຫຼຸດພົ້ນຈາກປະເທດດ້ອຍພັດທະນາ ໃນປີ 2020 ຕາມທິດທາງຂອງລັດຖະບານວາງອອກ.

ຈາກນັ້ນ ໃນພິທີ ທ່ານສະມາຊິກສະພາແຫ່ງຊາດ ແລະ ສະພາປະຊາຊົນ ນະຄອນຫຼວງວຽງຈັນ ກໍ່ໄດ້ສະເຫນີຜົນສຳເລັດຂອງກອງປະຊູມຄັ້ງປະຖົມມະລຶກຂອງສະພາແຫ່ງຊາດຊຸດທີ VIII ແລະ ສະພາປະຊາຊົນນະຄອນຫລວງວຽງຈັນ ຊຸດທີ I ທີ່ໄດ້ສຳເລັດກ່ອນຫນ້ານີ້ນັ້ນ ໃຫ້ແກ່ບັນດາຜູ້ເຂົ້າຮ່ວມໄດ້ມີຄວາມເຂົ້າໃຈ ແລະ ໄດ້ລາຍງານການເຄື່ອນໄຫວຂອງສະມາຊິກສະພາ ແຕ່ລະທ່ານ. ພ້ອມກັນນັ້ນ ທ່ານສະມາຊິກສະພາແຫ່ງຊາດ ກໍ່ໄດ້ເປີດໂອກາດ ໃຫ້ຜູ້ເຂົ້າຮ່ວມ ໄດ້ຊັກຖາມ ຂໍ້ສະເຫນີຕ່າງໆ ເຊິ່ງຫຼາຍຂໍ້ສະເໜີ ກໍ່ໄດ້ຮັບການຕອບແກ້ຂໍ້ຂ້ອງໃຈ ແລະ ຫຼາຍຂໍ້ ທ່ານສະມາຊິກສະພາແຫ່ງຊາດ ກໍ່ໄດ້ຮັບເອົາ ເພື່ອຫາທາງແກ້ໄຂໃນຕໍ່ໜ້າ.

ການເຂົ້າຮ່ວມຮັບຟັງດັ່ງກ່າວ ເປັນພາລະໜ້າທີ່ອັນໜຶ່ງ ທີ່ພະນັກງານສູນ ທີ່ນອນໃນຂົງເຂດສຶກສາ ຕ້ອງໄດ້ເຂົ້າຮ່ວມ ແລະ ເພື່ອເປັນການພົບປະແລກປ່ຽນຄວາມຄິດເຫັນ ຮັບຟັງບັນຫາສະພາບການຕ່າງໆ, ເຊິ່ງເປັນປະໂຫຍດໃຫ້ແກ່ການປະຕິບັດວຽກງານຂອງສູນໃນອະນາຄົດ.

ສະມາຊິກສະພາແຫ່ງຊາດ ຊຸດທີ 8 ລົງພົບປະ ພະນັກງານ ກະຊວງສຶກສາ 04 ສິງຫາ 2016

ສະມາຊິກສະພາແຫ່ງຊາດ ຊຸດທີ 8 ລົງພົບປະ ພະນັກງານ ກະຊວງສຶກສາ 04 ສິງຫາ 2016

ສະແດງຄຳຄິດເຫັນ...

%d bloggers like this: