fbpx

ຊ່ວຍກັນແກ້ໄຂຄວາມຫຍຸ້ງຍາກດ້ານເສດຖະກິດ

ທ່າມກາງຄວາມຫຍຸ້ງຍາກທາງດ້ານເສດຖະກິດມະຫາພາກ ທີ່ກຳລັງເກີດຂຶ້ນໃນປະເທດ, ພັກ ແລະ ລັດຖະບານ ໄດ້ມີການກຳນົດມາດຕະການຫຼາຍຢ່າງ ເພື່ອແກ້ໄຂບັນຫາ ເຊິ່ງເຫັນ ໄດ້ຈາກມະຕິຂອງກອງປະຊຸມຄົບຄະນະຄັ້ງທີ 7 ຂອງຄະນະບໍລິຫານງານສູນກາງພັກ ສະໄໝທີ X ແລະ ຈາກຄຳປາໄສຂອງທ່ານ ທອງລຸນ ສີສຸລິດ ນາຍົກລັດຖະມົນຕີ ທີ່ກ່າວໃນກອງປະຊຸມສະພາແຫ່ງຊາດ ໃນທ້າຍປີ 2018 ທີ່ຜ່ານມາ.

ມະຫາວິທະຍາໄລແຫ່ງຊາດ, ເຊັ່ນດຽວກັນກັບໜ່ວຍງານລັດພາກສ່ວນອື່ນ, ຕ້ອງໄດ້ມີການປັບຕົວບໍ່ຫຼາຍກໍ່ໜ້ອຍ ກັບສະພາບການທີ່ເປັນຢູ່ ຈາກການປັບຫຼຸດງົບປະມານຂອງລັດ, ການຫຼຸດຈຳນວນພະນັກງານຈາກການຫຼຸດໂຄຕາພະນັກງານລົງ ແລະ ອື່ນໆ. ຈາກທິດທາງດັ່ງກ່າວ ມະຫາວິທະຍາໄລແຫ່ງຊາດ ຈະຕ້ອງໄດ້ມີການສຶກສາຄົ້ນຄວ້າ ແລະ ປັບປ່ຽນແຜນການຂອງຕົນຄືນໃໝ່ຫຼາຍດ້ານ ເພື່ອໃຫ້ສາມາດດຳເນີນມາດຕະການປະຫຍັດລາຍຈ່າຍ ຂະນະດຽວກັນ ກໍຕ້ອງໄດ້ມີມາດຕະການໃນການຊອກຫາສ້າງລາຍຮັບໃໝ່ພ້ອມ.

ໃນການຈັດຕັ້ງເຊື່ອມຊຶມມະຕິ 7 ຂອງຄະນະບໍລິຫານງານສູນກາງພັກ ສະໄໝທີ X ທີ່ຈັດຂຶ້ນຕົ້ນເດືອນນີ້ ນອກຈາກການຄົ້ນຄວ້າເຊື່ອມຊຶມທິດທາງລວມຕ່າງໆແລ້ວ, ພະນັກງານຫຼັກແຫຼ່ງຫຼາຍທ່ານ ຍັງໄດ້ສະເໜີຄຳຄິດເຫັນທີ່ເປັນປະໂຫຍດຫຼາກຫຼາຍ ໃນການຫຼຸດລາຍຈ່າຍ ແລະ ເພີ່ມລາຍຮັບຂອງມະຫາວິທະຍາໄລ ແນໃສ່ເພື່ອຫຼຸດຜ່ອນງົບປະມານຂອງລັດ ກ້າວໄປສູ່ຄວາມສາມາດກຸ້ມຕົນເອງຫຼາຍຂຶ້ນ. ແຕ່ເຖິງຢ່າງໃດກໍ່ຕາມ, ຫຼາຍທ່ານກໍຍັງໄດ້ສະແດງຄວາມເປັນຫ່ວງ ຕໍ່ຄວາມຕັ້ງໃຈທີ່ແທ້ຈິງຂອງຜູ້ຮັບຜິດຊອບ ທີ່ຈະນຳເອົາທິດທາງ ແລະ ຄຳຄິດຄຳເຫັນຕ່າງໆ ໄປຈັດຕັ້ງປະຕິບັດ ໃຫ້ເກີດດອກອອກຜົນ ເປັນຮູບປະທຳ.

ຖືເອົາຜົນສຳເລັດ ແລະ ການຫັນປ່ຽນຕົວຈິງ ເປັນບັນທັດຖານແຫ່ງສະຕິຄວາມຮັບຜິດຊອບ ແລະ ຄວາມສາມາດຂອງຜູ້ນຳພາຢູ່ແຕ່ລະບ່ອນ

ຄັດຈາກມະຕິ 7 ສະໄໝທີ X ຂອງຄະນະບໍລິຫານງານສູນກາງພັກ

ສຳລັບສູນເທັກໂນໂລຊີຂໍ້ມູນຂ່າວສານ ໄດ້ມີຄວາມພະຍາຍາມ ໃນການປັບປຸງພາຍໃນຂອງຕົນມາໄລຍະໜຶ່ງແລ້ວ, ບໍ່ວ່າຈະເປັນການປັບປຸງພາຍໃນໜ່ວຍພັກໃຫ້ປອດໃສ, ເຂັ້ມແຂງ, ໜັກແໜ້ນ; ການປັບປຸງແບບແຜນວິທີເຮັດວຽກຢ່າງມີແຜນການ, ແຜນງົບປະມານ ມີການຕິດຕາມກວດກາ; ການທົບທວນຄືນ ແລະ ປັບປຸງພາລະບົດບາດຂອງສູນ; ລວມໄປເຖິງການປະຕິບັດໜ້າທີ່ການເມືອງຕ່າງໆຂອງສູນ.

ໃນປີ 2019 ນີ້, ສູນເທັກໂນໂລຊີຂໍ້ມູນຂ່າວສານ ຈະໄດ້ສືບຕໍ່ຂະຫຍາຍການນຳໃຊ້ລະບົບໄອທີເຂົ້າໃນວຽກງານບໍລິຫານ ບໍລິການຂອງມະຫາວິທະຍາໄລໃຫ້ຫຼາຍຂຶ້ນ ໂດຍປີນີ້ຈະໄດ້ຮ່ວມມືກັບຫ້ອງການທີ່ກ່ຽວຂ້ອງ ສຸມໃສ່ການພັດທະນາລະບົບການຮັບນັກສຶກສາໃໝ່ ໃຫ້ມີຄວາມສະດວກ ທັນສະໄໝ ເພື່ອກ້າວສູ່ການປະຫຍັດເວລາ ແລະ ງົບປະມານຕ່າງໆລົງ. ພ້ອມດຽວກັນນັ້ນ ກໍ່ຈະສືບຕໍ່ປະຕິບັດໂຄງການພັນທະຕ່າງໆ ທີ່ຖືກມອບໝາຍອີກດ້ວຍ.

ການແກ້ໄຂບັນຫາຄວາມຫຍຸ້ງຍາກດ້ານເສດຖະກິດມະຫາພາກນີ້ ແມ່ນພາລະໜ້າທີ່ຂອງໝົດທຸກຄົນ ທຸກພາກສ່ວນ ທີ່ຕ້ອງໄດ້ຮ່ວມມືກັນຢ່າງມີເປົ້າໝາຍ ຈຸດສຸມຄັກແນ່ ແລະ ພ້ອມກັນປະຕິບັດໄປຕາມຄວາມຮັບຜິດຊອບຂອງຕົນ. ດ້ວຍຄວາມສາມັກຄີຂອງພວກເຮົາທັງໝົດເທົ່ານັ້ນ ຈຶ່ງຈະສາມາດຜ່ານຜ່າອຸປະສັກທາງດ້ານເສດຖະກິດຄັ້ງນີ້ໄປໄດ້.

ສະແດງຄຳຄິດເຫັນ...

%d bloggers like this: